Chróšćanscy muzikanća

Lubosć k dujerkej hudźbje, serbska wutroba a słowjanski duch, to je jadro “Chróšćanskich muzikantow”. Mjeztym hižo přez 40 lět znošuja so zynki kapały po dwurěčnej Łužicy kaž tež po němskich stronach a w Čěskim a Pólskim wukraju. W třoch generacijach nastupja so hudźbnicy na něhdźe 20 koncertach w běhu lěta. Pisana měšeńca serbskich, němskich a čěskich štučkow zawjeseli k najwšelakorišim přiležnosćam, na wjesnych swjedźenjach, mejemjetanjach runje tak kaž k narodninam abo jubilejam.

W lěće 1994 załožichu z lubosće k serbskej hudźbje dźesać młodych serbskich hudźbnikow dujersku kapału Horjany w Hórkach (wjesny dźěl Chrósćic). W 15-lětnym jubilejnym lěće wobsteja Horjany z 18 hudźbnikow. W cyłosakskim wubědźowanju “Króna dujerskeje hudźby” dobychu wjacekróć požadany pućowanski pokal. W spočatnych lětach bě předewšěm čěsko-morawska dujerska hudźba elementarny wobstatk hudźbneho repertoira Horjany. Tole so w běhu lět dale a bóle ze serbskimi titlemi skulojći. Dźensa wustupuja na jubilejach a k swjatym dnjam a wobrubja je z klasiskimi dujerskimi sadźbami. Tež w europskim wukraju, kaž Čěskej, Belgiskej, Awstriskej a Pólskej, su rady widźani hosćo.

Balkaneros

Před nimale lětom smy so našej zhromadnej rozpalitosći za balkansku hudźbu dowobroćili a móžachmy skónčnje naše wulke přeće spjelnić balkansku band załožić. My, „Balkanerojo“, smy studowacy ze wšelakich fachowych wobłukow „Wysokeje šule za hudźbu Drježdźany“ a chcemy ze swojim wjeselom na hudźbje kulturu Balkana reprezentować. Naše songi wuznamjenjeja so přez hromaduwjedźenje tradicionalneje juhowuchodoeuropskeje ludoweje hudźby kaž tež nam znateho popularneho hudźbneho swěta. Wot melancholiskich kuskow hač k wulkej balkanskej party je za swět začućow wšitko pódla. Nimo toho hrajemy z mnohostronskej wobsadku wobstejace z drjewjanych a blachowych dujerjow, rytmusoweje skupiny a spěwanja. W našim programje staj mjez druhim balkanowi klasikarjo King of Balkana „Goran Bregovic“ a Mahala Rai Banda zastupjenaj. Wužiwajće něšto Balkana za dušu!

BrassWoofer

Z wjele kumštom přińdźe wjele zamołwitosće. Tohodla je jenož logiske, zo so ta z
dźewjeć dujerjemi a bubnarjemi wustupowaca band BrassWoofer hnydom wot dweju rapotaceju spěwarjow nawjeduje. Jónkrótna měšeńca z pseudo-intelektualnym
wulcečinjerstwom, jazz-podobnymi zynkami a ryzy hrajkanju da spěwy nastać, kiž zdadźa so runje tak zabawjace kaž pohnućace. We wěrnosći pak je hudźba
za ćěło přihotowana a přećiwo groovej njeměł so nichtó wobarać.
Z coverowymi spěwami jeje hudźbnych přikładow kaž Moop Mama, Youngblood Brassband
a Seeed je jězba započała. Nětko je band na dróhach swěta swój sound namakała: Organiske beats, napjate aranžementy a rap měšane z energetiskimi solami a wjacehłósnym spěwanjom. Wulki, pisany pakćik, kotrehož wobsah w liveshow k poćenju a šćěrjenju pohnuwa.